Negosyante Sa Caraga Region Mikumpirma, Davao, Digos Traders ang ‘Rice Hoarders’

June 10, 2008

Kumpirmado sa mga negosyante sa Caraga Region ang pag pang porma ug daghang bugas sa mga negosyanteng taga Digos, Davao City ug Cotabato aron tago-on una dayon ibaligya ug mahal sa panahon nga mangnihit na ang supply.
Matud sa mga negosyante ug bugas nga taga San Franz, gipakyaw sa mga taga Digos ug taga Davao City ang daghang bugas nila niadtong miaging semana, ug karon na gihinay-hinay pagpamaligya sa mas mahal kaayong presyo.

Si Concepcion Atamosa, presidente sa Pundok sa mga negosyante ug bugas sa Public Shopping Mall sa san Francisco, Agusan del Sur nagtug-an nga ang mga negosyanteng taga Digos City maoy namalit ug dinaghang bugas sa ilang stocks niadtong miaging semana, sa kantidad nga P1,600 kada sako. Nahibaw-an nila nga ang maong mga bugas nila, ginabaligya na sa taga Digos ug taga Davao sa kantidad nga tag P2,000 ngadto sa P2,200 kada sako, karon nga ming-nihit ang ilang supplies.

Gisulti ni Atanosa, nga “blind” gyod sila nga paagi lang diay kadto sa mga negosyanteng taga Davao ug Cotabato aron makaganansya ug sobra-sobra ang maong mga magpapatigayon ning panahon sa nihit sa supplies.

Sa Tandag City, gireport pod nga ang mga negosyante ug bugas, nangabot gyod bisan sa lugar nga uso ang samok-samok tali sa NPA ug sa mga sundalo, aron lang mamalit ug palay sa tag P25 kada kilo niadtong miaging semana.

Sa report ni Willy Evangelio sa Periodico SurSur, gisulti ni Lester Dagondon, manager sa Estrella Marketing sa Tandag City, nga ang mga taga Davao ug taga Cotabato nga mga negosyante ug bugas, maoy nagpalabwanay sa pagpamalit ug palay nga sobra ka mahal didto sa mga kaumahan sa lungsod sa San Miguel. Gitaho nga gikan sa P22 hangtud P25 kada kilo ang palit sa mga negosyante ug palay, nga halayo kayo sa tag P17 nga presyo sa gobyerno.

Niadtong panahon gyod sa ting-ani sa miaging bulan, ang kasagaran sa mga negosyante mamalit ug palay sa Caraga gikan ra gyod sa tag P15 ngadto sa P16 kada kilo.

Nasayran niadtong usa ka adlaw nga ang bugas sa Tandag, anaa na sa tag P42 ngadto sa P43 kada kilo ang tonner, nga may ubos sa baligya sa Davao City nga gitaho nga miabot na ug P51 ngadto sa P52 kada kilo.

Luyo sa kalit nga pagsulbong sa presyo sa bugas sa Caraga Region nagpadayon pod ang NFA sa pag supply sa tag P18.00 kada kilo nga bugas, Ugaling lang, gitaho nga limitado lang sa tag duha ka kilo kada adlaw ang ginabaligya ngadto sa mga mamalitay. (Chris Panganiban)

144 Ka Bag-ong Pulis Nanumpa Na

Dili 145 (sama sa una nilang gikataho), kondili 144 lamang ka mga bag-ong pulis nga gilangkuban sa 124 ka mga lalaki ug 20 ka mga babayeng recruits, gikan sa mga nagkalain-laing mga dapit sa Caraga region ang nanumpa atubangan ni PCSupt. Jaime E. Milla, sa parade grounds sa Campo Rafael C. Rodriquez, Libertad, Butuan City.
Ang “Oath-taking Ceremony” sa bag-ong mga pulis gitambongan sa mga tag-as nga mga opisyal sa PNP Regional Office, mga sakop sa selection board nga gilangkoban nila ni CSupt. Milla, CSupt. Laut Mustapha Sarip, Atty. Anthony Bitor (representante, DILG), Atty. Homer Mariano C. Cabral (NAPOLCOM Representantive) ug Mrs. Edna Hontiveros (Women’s Sectoral Representative) ug ingon man sa mga pamilya ug mga kaparyentehan sa mga recruits.

Ang mga PNP recruits nga gihatagan sa mga ranggong Police Officer 1 (Temporary Status) magadawat sa suhol nga P8,605.00, sugod sa Hunyo 1, 2008 samtang sila magabansay sulod sa unom ka mga bulan didto sa PNP Regional Training School, sa Camp Barbers, Lipata, Surigao del Norte.

Wala hinuon gitataw sa PRO 13 ang rason ngano nga nakulangan ug usa ka slot ang original nga quota nga 145.

Igo lamang nilang giingon nga mao ra kini gayud ang mi-qualify human sa RD’s appearance nga gipahigayon kagahapon.

Ang una gayud, 125 ka mga recruits ang gigahin alang sa Caraga Region, apan gidugangan kini ug 20 ka mga slots sa Kampo Crame, busa duna unta’y 145 nga quota.

Hinuon, giklaro ni P/Senior Insp. Nelly T. Villagarcia nga pulos na taga-Caraga Region ang mga nalakip sa quota karon, sukwahi sa una nga may mga recruits nga gikan sa PRO 10 ug 11 nga gipuno kay nakulangan ang mga kwalipikado gikan ning rehiyon.

Atol sa Pag-abli sa Klase: 1,000 Ka Pulis Ikatag Sa Caraga

Usa ka libo gyod ka mga pulis ang ikatag sa tibuok Caraga Region atol sa pag-bukas sa klase karong Hunyo 10, 2008.
Mao kini gipakanaog nga kamandoan atol sa command conference didto sa Camp Rafael C. Rodriquez ni Regional Director Chief Supt. Jaime E. Milla ngadto sa tanang hepe sa pulis sa mga probinsya sa siyudad sa Caraga Region.

“Our back to school preparations will focus on the safety of our students and they be protected from criminal elements,” sulti ni Gen. Milla.

Gitawag ug “Oplan Balik Eskuela 2008,” ang security plan, nag-awhag pod sa hingpit nga koordinasyon sa Department of Education ug sa uban pang mga opisyales sa gobyerno.

Ang “Oplan Balik Eskuela 2008” nagtumong sa pagpalig-on sa police visibility sa mga iskuylahan aron mapugngan bisan unsang krimen sama sa kidnapping, tulis o kawat ug sexual abuse nga mangbiktima sa mga tinun-an.

Hinuon, giklaro sa heneral nga sa kasamtangan, wala pay nakit-an o na-monitor nga seguridad sa mga estudyante.

Gimando ni Milla ang dugang police visibility ug anti-crime campaigns sa mga dapit duol sa mga tunghaan.

Sa report, gimando pod sa heneral ngadto sa mga field unit commanders ang pagpakigtagpo ngadto sa mga grupo sa mga homeowners, parent-teacher associations, barangay watchmen ug school guards aron matuki ug maayo ang mga security plans labot sa pagsugod na pod sa klase.

Ang mga hepe sa pulis sa mga siyudad ug lalawigan, gimandoan pod ni Milla nga limpyohan ang mga lugar sa tunghaan gikan sa nagkatag nga mga graffiti, ug kinahanglan magtakda ug pedestrian lanes, samtang susihon usab ang mga delikadong dapit nga maghatag ug disgrasya sama sa way taklob nga mga manholes ug mga koneksyon sa electrical wires.

Hasta ang mga internet shops duol sa mga tunghaan, kinhanglan sigurohon nga walay kabataan nga magyampungsad sa video karera games ug uban pang illegal number games.

Pasiunang gipakatag sa PRO 13 ang regional mobile force aron tabangan ang local nga kapolisan sa pagpalig-on sa local nga mga puwersa atoll sa pagbukas sa klase.

Sa Caraga Region: BIR Collection Computerized Na

Sa tinguha nga mas mapalambo ang koleksyon sa buhis, mahatagan ug mas maayong serbisyo ang magbubuhis ug masumpo na ang pagpauso sa mga taxpayers nga paglihay sa pagbayad sa buluhisan (tax evasion), gilusad sa Bureau of Internal Revenue (BIR) ang Nationwide Rollout of Computerized System (NCRS) Program sa Caraga Region (Revenue Region 17) sugod niadtong miaging semana.

Ang Revenue Region 17, gilangkuban sa mga lalawigan ug dakbayan sa Butuan, Agusan del Sur, Surigao City ug Surigao del Sur.

Ang NCRS nagatumong sa hingpit nga computization sa operasyon sa BIR sa tibuok nasod. Atol sa launching niadtong miaging semana, mitambong sila sa BIR Deputy Commissioner Lucita Rodriquez, Assistant Commissioner Leonor S. Villalon-Rogers ug RR 17’s Officer-in-Charge Regional Director Atty. Malic M. Umpar, RDO 103 (Butuan) Edilberto Radaza, RDO 106 (Tandag) Marcelino Yap, Ms. Rose Amper, representante sa Mellenium Challenge Account-Philippines Threshold Program Technical Assistance Project (MCA-PTP TAP) nga misuporta sa NCRS, ug ubang miyembro sa partry ni Mr. Victor Baylon ug Ms. Cynthia S. Rabang.

Ang Computerization program nag-automate sa rehistrasyon, koloeksyon, returns processing u gang accounting processes sa magbubuhis.

Kini naghatag ug kahigayonan ngadto sa BIR sa pagtubag sa mga serbisyo ug paghimo niini sa labing mubo nga panahon.

Kini usab nagahimo sa operasyon sa RR ug RDOs nga mas epesyente ug epektibo. Kini usab nagahatag sa BIR sa mas komprehensibo nga databank ug compare data ug sayon masakpan ug pag-ila sa mga tax evaders,

Ang NCRS nagasangkap sa RR 17 ug 31 ka mga computers, 16 ka mga printers, 28 ka mga filing cabinets, 31 ka mga computers tables ug lingkoranan uban sa mga gikinahanglan mga electrical updates ug Local Area Network (LAN) cabling nga migasto ug P3 milyones ka pesos. Ang mga personahe usab sa RDO gibansay sa nagkadaiyang mga buluhaton sa operation ug sa sistema ubos sa programa.

Ang MCA-PTP TAP mi-assistir sa kagamhanan sa Pilipinas aron mapalambo ang revenue administration ug masumpo ang korapsyon. Kini gisuportahan sa US$20.6 million grant gikan sa Millenium Challenge Corporation, korporasyon sa gahamhanan sa Estados Unidos nga misuporta sa pagpalambo sa mga programa ug proyekto sa tibuok kalibutan. Ang maong grant gihatag sa United States Agency for International Development (USAID)

40-Anyos nga Wanted sa Murder Nasikop

Nasikop sa mga sakop sa Placer Municipal Police Station, sa Placer, Surigao del Norte ang usa ka wanted sa kasong “Murder” didto sa Brgy. Banban, Taganaan, Surigao del Norte alas 11:00 sa buntag niadtong niadtong usa ka adlaw.

Ang pinangita nga si Reynaldo Ejandra y Chato, 40-anyos ang edad, molupyo sa barangay Banban, nasikop sa kapolisan sa Placer nga gipanguluhan ni SPO2 Arsenio Sepe Galgo, base sa Arrest Warrant nga gipirmahan ni Judge Floripinas C Buyser, sa RTC Branch 30, Surigao City nga naka-docket ubos sa Criminal Case No. 7937 sa kasong “Murder.” Walay piyansa nga girekomenda ang korte alang sa temporaryong kagawasan sa akusado.

Ang dinakpan gidetene karon sa Placer PNP, samtang gipaabot ang sunod nga mando sa korte.